30.06.2019
ЗУГАА НААДАТАЙГААР ЗУҺАНА
Урлан бүтээхэ шадабарияа мүлинэ
Улаан-Үдэ хотын захиргаанай мэдэлэй ори гансахан хүүгэдэй амаралгын ба ажалай “Чайка” лагерь мүнөө жэл Ородой Холбоото Уласай Болбосоролой яаманай харалганда хабаадажа, 8 сая 500 мянган түхэригэй грантда хүртэбэ. Энэ мүнгэн дэмжэлгэ нэмэлтэ һуралсалай эмхиин байгуулагдаһаар 25 жэлэй ойн баярта ехэхэн бэлэг боложо үгэбэ гээшэ.
Зунай амаралтын эхилхэ тээшэ түрэлхид үхибүүдээ ямар газар эльгээжэ амаруулхаб гэжэ бодолгото болодог. Гэхэ зуура, Буряад Уласта жиирэй гү, али багахан мүнгөөр элүүржүүлэн амаруулха лагерьнууд тон үсөөн. Олон хүүгэдтэй гэр бүлын ба хүндэ байдалда ороһон үхибүүдые хүнгэлэлтэтэйгөөр амаруулхань баһал хүшэршэг. Эндэмнай ямар лагерьнууд бииб, хайшан гэжэ тиишэнь эльгээхэб гэжэ хүсэд мэдэдэгшьегүй түрэлхид байха.
Зүгөөр зундаа үхибүүд амархынгаа хажуугаар өөр- төө таарама ажал хэжэ, мүнгэшье олохо аргатай бшуу. Улаан-Үдэ хотодо эгээл иимэ үүргэ бэелүүлдэг ори гансахан “Эдельвейс” гэһэн түб байна. Тэрэниие психологиин эрдэмэй дид-доктор, үхибүүдые хүмүүжүүлгын ажалда бүхы наһаяа, һанал сэдьхэлээ зорюулһан Ирина Басхаева хүтэлбэрилнэ.
- Хүүгэдэй нэмэлтэ һуралсалай “Эдельвейс” түб жэлэй туршада ажаллажа байдаг 6 клубтай, мүн зундаа 3 хаһада хүдэлдэг “Чайка” гэһэн үхибүүдэй амаралгын ба ажалай лагерьтай юм. Эндэ хаһа бүхэндэ 80 үхибүүд амардаг. Харин зунай туршада дунда зэргээр 160-200 эдиршүүл амархынгаа хажуугаар ажал хэжэ, салин абадаг, - гэжэ Ирина Иннокентьевна хөөрэнэ.
Хүндэ байдалда ороһон үхибүүд эндэ миинтээр амардаг. Тэдэниие Ниигэмэй хамгаалгын яаман эльгээдэг. Лагерь зунай туршада бүхыдөө 55 иимэ үхибүүдые амаруулха аргатай. Тэдэ бусад үхибүүдтэй суг хамта амаржа элүүржүүлэгдэнэ, хү- мүүжүүлэгдэнэ.
Түүхэтэ газарта оршодог
“Чайка” лагерь Нарин Асагадһаа зүүлжээ үзэсхэлэн һайхан байгаалитай газарта оршодог. Эндэ үшөө 1825 онуудаар Мамба дасан бодхоогдоһон түүхэтэй. 1911 ондо Хамба лама Юролтуев 50 эмшэ ламанарые суглуулаад, эмнэлгын газар нээжэ, эндэхи дом ургамалаар болон аргами аршаанаар үбшэнтэниие аргалдаг байһан. Тэрэ аршааниинь мүнөөшье болотороо гараһан зандаа. Үхибүүд тэндэһээнь хүртэжэ, бэе махабадаа бэхижүүлнэ. Бишье Улаан-Үдын бүгшэмһөө иимэ арюун сэбэр газарта гэнтэ хүрэжэ ерэхэдээ, арюухан аршаанһаа удаан амсажа зогсоо бэлэйб. Аргами шэдитэй иимэ аршаанта газарта Юрөөлтын хамба лама түбэд эмнэлгын газар дэмы нээгээгүйл ёһотой. Тэрэ сагай эмнэлгын шэдитэ арга тухай холо ойро суурхаһан ушарнууд дэлхэйн түүхэдэ эли бшуу.
1936 ондо Мамбын ехэ һургуули, эмнэлгын газар үгы хэгдэжэ, энэ байшан соо үншэн хүүгэдэй НКВД- гэй мэдэлэй интернат байгуулһан юм. Эндэ хамалган хашалганай үедэ “арадай дайсадай” үхибүүдшье, үншэн хэнзэ хүүгэдшье ажал хэжэ, хүмүүжүүлэгдэдэг һэн. 1946 ондо интернат үгы хэгдэжэ, Буряад Уласай Болбосоролой яаманай мэдэлэй болоо бэлэй. 1994 он болотор Улаан-Үдын 3-дахи интернат-һургуулиин хам- һабариин эмхи байһанаа, ниислэл хотын һуралсалай хүтэлбэридэ дамжуулагдажа, хүшэр байдалда ороһон үхибүүд эндэ амардаг болоһон. Һүүлдэнь “Чайка” гэжэ үхибүүдэй амаралгын ба ажалай лагерь нээгдээд, байгша ондо 25 жэлэйнгээ ойн баяр тэмдэглэнэ.
Эрхимүүдэй нэгэн болонхой
Һая болотор “Чайка” лагерь балайшье ехэ амжалтагүй, юрын лэ нэмэлтэ һуралсалай эмхи байгаа бэлэй. Харин 2015 оной октябрь һараһаа Ирина Басхаевагай хүтэлбэри доро һайн тээшээ эгсэ хубилалтанууд боложо эхилээ юм. 2016 онһоо 2019 он хүрэтэр эндэхи хэдэн байшан һэльбэн шэнэлэгдээ, мүнөө үеын эрилтэдэ таарама тамирай талмай зохёогдоо, бассейн абтаа, унталгын, амаралгын таһалганууд булта заһабарилагдаа. Уһа дамжуулдаг соргонууд татагдаа, түбэй газар дэбисхэр хорёологдоо.
Оршон тойронхи байра байдал адаглан харахада, һайн эзэнэй гар мэдэрхээр. Мүн эндэхи хүдэлмэрилэгшэдшье булта хэжэ байһан ажалдаа тон дурланхай гэжэ эли. Мүнөө сагта үхибүүдтэй ажаллахань хүшэр, мүн түрэлхидтэй харилсаха гээшэ баһал бэлэн бэшэ ха юм даа.
Нүхэдтэеэ хамта ургамалшье уһалхада урматай
Үхибүүдые амаруулха, ажал хүүлэжэ, салин түлэхэ үүргэтэй хадаа шэнэ теплицэнүүдые худалдажа абаа, эдеэнэй ургамалнуудые тариха һууринуудые бэлдээ, сэсэгүүд болон жэмэстэ модохонуудые һуулгаа. Лагерьнуудай дунда жэл бүхэндэ харалган соносхогдожо, хэһэн ажалайнь дүн согсологдодог заншалтай юм. Тиигэжэ 2016 ондо “Чайка” лагерь III һуури эзэлээ. Харин 2017, 2018 онуудта эгээл эрхим лагерь гэжэ тодорһон байна.
- Бидэ мүнөө туйлаһан амжалтаяа алдангүй, саашаа улам хүгжэхэ хүсэлтэйгөөр ажалаа үргэлжэлүүлнэбди. 2019 оной дүнгөөр нэмэлтэ һуралсалай түрүү эмхи болохо гэжэ оролдонобди, - гэжэ хүтэлбэрилэгшэ Ирина Басхаева мэдээсэбэ.
Урагшатайгаар хүдэлжэ байһан лагерь Засагай газарһаа мүнгэн дэмжэлгэдэ ходо хүртэнэ. 2016 ондо 800 мянган түхэриг һомолһон һаа, ажалайнь эрхим дүн- гүүдые хараадаа абажа, 2017 ондо 4 сая түхэриг шэглүүлээ һэн. 2018 ондо 1,5 сая түхэриг үгтөө, мүнөө жэл - 2 сая. “Чайка” лагерь бүхы мүнгэн зөөриеэ тон зүбөөр ашаглажа, байдалаа һайжаруулна, ажал хэрэгээ урагшатайгаар ябуулжа шадана.
Улаан-Үдэ хотын 14-дэхи гимназиин 6-дахи ангиин һурагша Женя энэ лагерьта хоёрдохи жэлээ амархаяа ерэнхэй.
- Би олон нүхэдтэй болооб. Нёдондо танилсаһан нүхэдтэеэ дахин мүнөө жэл уулзаабди. Эндэ элдэб наһанай үхибүүд амардаг. Багашуулые харалсадагбди, эбтэй томо бүлэ шэнгеэр байдагбди, - гэжэ Женя басаган хөөрэнэ.
3–дахи лицейн һурагша Дари тамираар бэеэ һорихо дуратай.
- Би эндэ теннис наадажа һурааб. Бултадаа лото нааданабди. Мүн волейбол, баскетбол наадаха тон дуратайб. Ехэ хүхюутэйгээр амаржа байнаб, - гэжэ тэрэ дуратайгаар хөөрэбэ.
Энэл һургуулида һурадаг Диана зураг зураха ехэ дуратай юм. Шаазан амһарта дээрэ зураһан зурагаа харуулаа. Шэрээ тойроод ганса багашуул һуунад. Тэдэ шадаха зэргээрээ элдэб юумэ бүтээнэ. Нэгэниинь пластик стаканаар дурамбай дархална, нүгөөдэнь һалхи һэбидэг веер бүтээнэ. Эдэ багашуулай дунда томоотойхон һууһан Диана хүмүүжүүлэгшэдтээ һайн дураараа хамһалсадаг байна.
Софья Полина хоёр шабараар элдэб зүйлнүүдые бүтээжэ байһан үхибүүдтэй һуужа, баһал юуб даа урлана.
- Бидэ хоёр УПК-да нэгэ жэл вожатын һуралсал гараабди. Мүнөө эндэ амархадаа, практика гаража байнабди. Һүүлдэнь үшөө нэгэ жэл һураад, дахин дадалга гарахабди. Тиигээд одоол вожатын үнэмшэлгэтэй болоод, эндэ ажаллахадаа, бүрин бүтэн салин абахабди, - гэжэ Софья хөөрэнэ.
Полинын хэлэһээр, үхибүүдтэй хүдэлхэ гээшэ хүшэрхэн. Гэбэшье, өөрөө 9-дэхи ангида һураһаншье һаа, томоотойхоноор багашуулые һамааруулжа шадана.
- Үхибүүдые һонирхуул- хань бэлэн бэшэ. Нэгэ наада наадуулхадашни, нүгөө зариманиинь ондоо наада наадахаяа һанана. Тиихэдэнь отрядаа хоёр бүлэг болгоод, хоёр ондоо наадаар үхибүүдые һамааруулнабди. Тэдэниие һонирхуулжа шадаха гээшэ баһал нэгэ ехэ хэрэг, - гэжэ тэрэ һанамжална.
Эдэ хоёр басагад “Чайкада” амарангаа, вожатын туһалагшаар ажаллаһанайнгаа түлөө үшөө салин абаха юм. Иимэ үхибүүд баһал бии. Хэн бэ даа огородой эдеэ ургуулна, хэн бэ даа компьютераар хүдэлнэ. Бусадшье ажалта һууринууд олдохо.
“Чайка” лагерь мүнөө жэл Ородой Холбоото Уласай Болбосоролой яаманай ехэ грантда хүртэжэ, энэл хаһадаа хэжэ байһан ажалаа оньһожоруулха, оршон үеын шэнэ хэрэгсэлнүүдые худалдажа абаха, ажалаа улам хүгжөөхэ юм. Үхибүүдээ туһатайгаар, олзотойхоноор амаруулха гэбэл, шамдагты. Һангай ажалда хүдэлдэг гэртэхин 11 488 түхэриг түлэжэ, үхибүүдээ 21 үдэрэй туршада амаруулха аргатай. Мүн 14-һөө 17 хүрэтэр наһатай үхибүүд амарангаа ажалханиие хэжэ, багаханшье һаа, салин абаха.
Цырегма САМПИЛОВАГАЙ гэрэл зурагууд
Просмотров всего: , сегодня:
Дата создания: 30.06.2019
Дата обновления: 30.06.2019
Дата публикации: 30.06.2019